2020年長江基建(1038)業績預測

唔經唔覺又到左財報季，呢篇文章我打算講吓長建2020年全年業績嘅預測，大家都知長建上半年帳面盤數好肉酸，主要因為英國既企業稅維持不變，增加咗一筆過非現金嘅延遞稅開支，令到成個集團上半年賺小14億港元。跟住落嚟會同大家分享下我對建建下半年業績嘅預測。

首先,我哋要睇吓建建喺2019年同2020年上半年嘅業績先，為左方便大家睇，我簡單咁整咗個表。

(Source: 長建基建財報 2019 S1, 2019 FULL YEAR, 2020 S1)

上面嘅資料喺喺建建財布入面搵出黎，當然未必完全準確，但喺應該都八九不離十。建建嘅業務相對簡單，財報都好清晰寫明各項業務嘅溢利，下面我會逐個業務講吓，同埋預測下建建2020年既業績。

電能實業

首先講吓電能，電能嘅資產除咗港燈之外，大部分都喺同長建共同投資，而長建喺2020年直接持有電能35.96%股權(7.67億股)，換句話講投資電能嘅收益絕大部分都體現喺電能嘅派息。喺2019年嘅時候，長建有38.01%既電能股權，而2019年1月10日長建公告減持電能2.05%股權，所以2019年上半年電能嘅收益已經反映咗因為出售電能股權而導致嘅收益減少。而電能喺2019年上半年同下半年歸屬長建嘅溢利分別喺13.63億同12.01億。換句話講12-13億可以話係基數。而2020年上半年電能貢獻咗8.13億溢利俾長建，點解會小咁多呢？喺2020年中期業績入面係咁解釋嘅：

溢利貢獻下跌之主因與長江基建類同，包括：

(i) 英國業務重新計算遞延稅項負債之一次性支出；

(ii) 集團於二零一九年出售電能實業權益所錄得收益入賬；以及

(iii) 2019 新型冠狀病毒帶來之影響。

咁究竟以上嘅解釋影響到幾多溢利呢？首先，英國業務重新計算遞延稅項負債之一次性支出的確係一個好大嘅影響，電能喺2020年5月6日出公告：

英國政府建議自2020年4月1日起適用的企業稅稅率將維持為19%，而非如先前根據英國2016年金融法所頒佈自2020年4月1日起降低至17%。本集團預期將於其截至2020年6月30日止六個月之綜合財務報表中攤佔合營公司及聯營公司的業績而錄得約港幣八億元之一次性不利影響。

由於長建持有電能35.96%股權，所以對長建的貢獻會減少大約2億8千7百萬港元。

第二、集團於二零一九年出售電能實業權益所錄得收益入賬，以我所知2019年減持電能後獲得嘅4億2千7百萬同電能原本嘅溢利喺分開咁列出黎，所以呢個唔係一個好嘅理由。

第三、2019 新型冠狀病毒帶來之影響，無可否認，你可以話疫情令到好多公司、工廠唔開工，用電量大減。但係，多左人留喺屋企同理地都會用多咗電，當然工商用電嘅價錢同住宅用電唔同，但喺相信可以抵銷一部分影響，所以帶嚟嘅影響相信唔算大，估計最多就1、2億。

基於以上推測2020年上半年電能嘅貢獻會顯著提高至12億港元左右，再加上英鎊匯率不斷咁升（見下圖）

我估計2020年下半年電能嘅溢利貢獻會有12.8億港元左右，全年貢獻為約20億9千3百萬港元。

英國基建業務

長建喺英國嘅業務同權益

業務	所持權益	額外經濟收益
UK Power Networks	40%
Northumbrian Water	40%	12%
Northern Gas Networks	47.10%
Wales & West Gas Networks	30%	9%
Seabank Power	25%
UK Rails	50%	15%

(Source: 長建官網)

分析2020年下半英國業務之前我哋先一齊睇吓長建點解釋2020年上半年嘅表現咁差先。根據2020年中期業績報告，長建係咁寫嘅：

有關跌幅乃歸因於

(i) 重新計算遞延稅項負債之一次性支出；

(ii) 2019 新型冠狀病毒之影響；以及

(iii) Northumbrian Water 新規管期之收入較去年同期為低。

首先睇吓第一個解釋，重新計算遞延稅項負債之一次性支出，長建同電能一樣，因為英國嘅業務要重新計算遞延稅項，所以產生咗一筆過14億港元嘅負債。呢14億入面有2億8千7百萬喺屬於電能嘅。由此可以推算長建喺2020年下半年英國業務表現一定會比上半年好好多。

其次，大家可以禁入去上按各間公司嘅年報睇吓，雖然年報結算日期同香港唔同，英國係4月1日，香港係12月31日，但係都有一定參考價值。最大收入嘅3間公司UK Power Networks、Northumbrian Water、UK Rails，佢哋嘅收入係有唔錯嘅增長。

UK Power Network

Northumbrian Water

UK Rails

當然以上3份財報都只係反映到2020年3月31日止嘅狀況，之後嘅時間全球都受疫情影響，一定會有打擊。UK Power Network喺呢份財報入面寫明截至020年3月31日UK Power Network並無申請任何政府因Covid-19提供嘅補貼，之後有冇申請就唔知啦。即使UK Power Network會受疫情影響業績，我相信同2019年業績分別不大，貢獻20億5千8百萬港元。

另外Northumbrian Water因為新監管期開始，而且準許回報率大減，Northumbrian Water嘅水費要減21% ，Northumbrian Water本身亦有佔比好細嘅不受規管業務，加上NW而家都同CMA上訴緊，有機會調升準許回報率，預計3月8日有最終結果，想知發展如何，可以點吓呢度睇睇。但係即使上訴成功對2020年嘅業績影響不大，因此我預期Northumbrian Water 2020年嘅利潤為3億6千3百萬港元，長建佔52%，所以會有大約1億8千9百萬嘅溢利。

因此我估計整個英國嘅業務會溢利約22億港元，基於冇咗延遞稅嘅一次性影響、英鎊匯率上升抵銷部分疫情帶來嘅影響。

澳洲基建業務

關於澳洲基建業務方面，長建喺2020年中期報告話：

澳洲業務的溢利貢獻為港幣九億一千八百萬元，按年下跌百分之十七，主要歸因於澳元疲弱及 2019 新型冠狀病毒疫情影響。

Covid- 19就一定有影響啦，再加上2020年上半年澳幣成條軟皮蛇咁，雙重打擊，預左業績會好差。但係2020年下半年開始，澳幣上晒電咁，升咗好多（見下圖）。

我相信澳幣升值會抵銷Covid-19所帶嚟嘅影響，加上澳幣嘅匯率甚至升得比2019年更高，所以我預計可以貢獻長建10億港元嘅溢利。

歐洲大陸基建業務

長建嘅歐洲大陸基建業務由 ista、Dutch Enviro Energy 及 Portugal Renewable Energy 三間公司組成。其中長建喺2020年8月17日出公告出售葡萄牙風電業務Iberwind，於是次交易預期可獲得約港幣十一億元的實際溢利。所以第四季度歐洲大陸基建業務嘅收入會減少，但係喺歐羅升值嘅情況之下，預期會抵銷部分影響。

所以，歐洲業務方面，預期同上半年持平，為長建帶嚟5億港元左右嘅溢利。

加拿大基建業務

長建嘅加拿大業務有Reliance Home Comfort、Canadian Midstream Assets、Canadian Power Holdings Inc.、Park'N Fly。預期Park'N Fly嘅業務會繼續仆直，但係加幣嘅升值能夠抵銷有餘，所以我估計加拿大基建業務會有1.5億港幣嘅溢利貢獻。

新西蘭基建業務

喺2020年中期報告入面，長建咁寫

因應 2019 新型冠狀病毒所採取之封城措施令商業廢物收集服務暫停，EnviroNZ 旗下業務受到短期影響，相關貢獻亦有所減少。隨著當地疫情逐漸緩和，該公司於下半年度之表現可望改善。

於二零二零年四月一日實施之新規管協議導致准許回報下調，Wellington Electricity 之溢利貢獻較去年同期錄得跌幅。

預期下半年嘅商業廢物收集服務應該都唔會有咩收入，所以表現都係繼續差。加上Wellington Electricity嘅准許回報下調，即使匯率有上升，但係業績好大機會比上半年更差，可能只有4千萬港元溢利貢獻。

香港及中國內地業務

由於2019年已經出售部分內地收費道路，因此2020業績表現必定比2019年差，我估計與2020年上半年持平，溢利1億2千萬港元。

其他收入

出售葡萄牙風電業務Iberwind，於是次交易預期可獲得約港幣十一億元的實際溢利。

總結

我估計2020年全年業績如下圖

由於我唔清楚溢利歸屬入面本公司股東、永久資本證券持有人、非控股權益三樣嘅比例係點，所以我預期：

2020年全年本公司股東嘅溢利大約有88億8千萬港元

2020年每股溢利為3.32港元

2020年會派末期息每股1.79港元，全年派息每股2.47港元，派息比率74.4%。

睇吓我嘅猜測啱唔啱啦。